1. مين المسؤول عن بياناتك
مؤسسة محمد أبو مشرف للتسويق الإلكتروني، سجل تجاري رقم 502297 (الرقم الوطني للمنشأة 100956348)، عمّان، الأردن، اللي بتدير زفّة (weddingcard.tech). لأي سؤال أو طلب بخصوص بياناتك: واتساب +962 7 9068 3074 أو الإيميل support@weddingcard.tech.
2. شو البيانات اللي بنجمعها
| البيانات | من وين | ليش |
|---|---|---|
| محتوى الكرت: أسماء العرسان والأهل وألقابهم، التاريخ، الوقت، القاعة، الصيغة، الملاحظات، وبرنامج الحفل | منك بأداة التصميم | لعرض الكرت على رابطه |
| بيانات الطلب: رقم الطلب، الباقة، المبلغ، طريقة الدفع، وحالته | منك وقت النشر | لتنفيذ الطلب والمحاسبة والاسترجاع |
| اسم الضيف وجوابه وعدد الأشخاص | من الضيف إذا عبّى تأكيد الحضور | لتشوفي مين جاي |
| الاسم ورقم الواتساب وموعد العرس | منك إذا سجّلتي بقائمة الانتظار أو تواصلتي معنا | للتواصل معك بخصوص زفّة بس |
| صورة تحويل CliQ | منك عالواتساب | لتأكيد الدفع |
بيانات البطاقة (الرقم والتاريخ والرمز) ما بتوصلنا أبداً. بتنكتب مباشرة بنموذج مزوّد الدفع، وإحنا بيوصلنا بس إنه الدفع نجح.
3. مع مين بنشارك البيانات
- ضيوفك: أي شخص معه رابط الكرت بيشوف محتواه. صفحات الكروت مخفية عن محركات البحث.
- مزوّد الدفع بالبطاقة: بيستلم بيانات البطاقة وعنوان الفوترة اللي بتكتبيها، وبيعالجها حسب سياسة الخصوصية تبعه.
- مزوّد الاستضافة: بيخزّن الموقع وقاعدة البيانات على خوادمه.
- خدمات عرض الصفحة: الخطوط والأيقونات بتنحمّل من خدمات خارجية (مثل Google Fonts)، وخريطة موقع القاعة بالكرت بتنعرض من خرائط جوجل. هاد بيعطيهم عنوان IP تبع جهاز اللي فاتح الصفحة.
- الجهات الرسمية: بس إذا طلبها القانون.
ما منبيع بياناتك ولا منأجّرها لحدا.
4. قديش بنحتفظ فيها
- محتوى الكرت وردود الضيوف: طول مدة الكرت (أسبوع بعد العرس للمجاني، وسنة للمدفوع)، وبعدها بنحذفهم.
- سجلات الطلبات والدفع: للمدة اللي بيطلبها القانون للسجلات المالية.
- قائمة الانتظار: لحد ما نطلق ونتواصل معك، أو لحد ما تطلبي الحذف.
5. حقوقك
بتقدري بأي وقت تطلبي: نسخة من بياناتك، تصحيحها، حذف الكرت وبياناته، أو إنه نوقف التواصل معك. ابعتيلنا رقم الطلب على الواتساب أو الإيميل، ومنرد خلال 7 أيام عمل. حذف الكرت بيوقف رابطه نهائياً.
6. الحماية
الموقع شغّال على HTTPS، ولوحة الإدارة محمية بكلمة سر، والوصول للبيانات محصور بفريق زفّة. ولأنه ما في نظام على الإنترنت محمي 100%، ما تكتبي بالكرت معلومات حساسة ما إلها داعي.
7. الكوكيز
الموقع ما بيستخدم كوكيز للإعلانات أو التتبّع. مزوّد الدفع ممكن يستخدم كوكيز لازمة لأمان عملية الدفع.
8. الأطفال
الخدمة موجّهة للبالغين. ما منجمع بيانات أطفال عن قصد.
9. القانون
منتعامل مع البيانات الشخصية حسب قانون حماية البيانات الشخصية الأردني رقم 24 لسنة 2023.
10. تعديل السياسة
إذا عدّلنا هالسياسة، بنغيّر تاريخ آخر تحديث فوق، وإذا كان التعديل جوهري بنحكيلك.