1. مين إحنا
زفّة (weddingcard.tech) خدمة لتصميم ونشر كروت أعراس إلكترونية وفيديوهات دعوة، بتديرها مؤسسة محمد أبو مشرف للتسويق الإلكتروني، سجل تجاري رقم 502297 (الرقم الوطني للمنشأة 100956348)، عمّان، الأردن. للتواصل: واتساب +962 7 9068 3074 أو الإيميل support@weddingcard.tech.
2. الخدمة
- بتصمّمي كرت دعوة إلكتروني بأداة التصميم، وبعد النشر بيصير إله رابط خاص بتبعثيه للضيوف.
- الباقة المجانية بتنشر الكرت مع سطر صغير "صُمّم مع زفّة"، وبيضل شغّال لحد أسبوع بعد تاريخ العرس.
- الباقات المدفوعة (الكامل والفاخر) بتفتح ميزات إضافية حسب صفحة الأسعار، والكرت بيضل شغّال سنة من تاريخ النشر.
- فيديو الدعوة الموشن (بالباقة الفاخرة أو كإضافة) بيتجهّز من نفس تصميم الكرت، ومعه تعديلين.
3. مسؤوليتك عن المحتوى
- إنتِ مسؤولة عن صحة كل المعلومات بالكرت: الأسماء، الألقاب، التاريخ، الوقت، والمكان. راجعيها قبل النشر.
- لازم يكون عندك إذن تكتبي أسماء الأشخاص اللي بالكرت (الأهل والضيوف).
- ممنوع استخدام الخدمة لمحتوى مسيء أو مخالف للقانون أو منتحل لشخص تاني. منقدر نوقف أي كرت مخالف بدون استرجاع.
4. الأسعار والدفع
- الأسعار بالدينار الأردني، والدفع مرة وحدة لكل عرس، مش اشتراك.
- الدفع بالبطاقة (فيزا وماستركارد): بيتسحب من البطاقة المبلغ المقابل بالدولار الأمريكي المكتوب وقت الدفع (مثلاً 42 دولار لباقة الكامل). أي فرق عملة أو رسوم من البنك اللي أصدر البطاقة بيتحمّلها صاحب البطاقة. الدفع بيتم عن طريق مزوّد دفع دولي معتمد، وممكن يظهر اسمه على كشف حساب البطاقة.
- الدفع بـ CliQ: بتحوّلي المبلغ بالدينار على الاسم المستعار المكتوب برقم الطلب، والكرت بينشر بعد ما نتأكد من وصول التحويل.
- منقدر نغيّر الأسعار بأي وقت، والتغيير ما بيأثر على طلبات انفدعت قبله.
5. الرابط والخصوصية
صفحات الكروت مخفية عن محركات البحث، بس أي شخص معه الرابط بيقدر يفتح الكرت. انتبهي لمين بتبعثيه. التفاصيل بـ سياسة الخصوصية.
6. الاسترجاع
شروط استرجاع المبلغ مكتوبة بـ سياسة الاسترجاع.
7. توفّر الخدمة
منعمل اللي بنقدر عليه ليضل الكرت شغّال طول مدته، بس ما منضمن إنه الخدمة ما تتوقف أبداً (صيانة، أعطال إنترنت، أو مزوّدين خارجيين). إذا توقف كرت مدفوع بسبب خطأ منا وأثّر على دعوتك، بتنطبق عليه سياسة الاسترجاع.
8. حدود المسؤولية
مسؤوليتنا بأي حال ما بتتجاوز المبلغ اللي دفعتيه للطلب المعني. ما منكون مسؤولين عن أي ضرر غير مباشر، مثل غياب ضيوف أو خطأ بمعلومات إنتِ كتبتيها.
9. الملكية
التصاميم والرسومات والقوالب ملك لزفّة. المحتوى اللي بتكتبيه إلك، وبتسمحيلنا نعرضه بالكرت ونحفظه لتشغيل الخدمة بس. ما منستخدم كرتك كمثال بالموقع إلا بموافقتك المكتوبة.
10. القانون المطبّق
هالشروط بتخضع لقوانين المملكة الأردنية الهاشمية، ومحاكم عمّان مختصة بأي نزاع.
11. تعديل الشروط
منقدر نعدّل هالشروط، وبنكتب تاريخ آخر تحديث فوق. استمرارك باستخدام الخدمة بعد التعديل يعني موافقتك عليه.